नेपालगन्ज -बाँकेको खजुरा स्थित शुशील कोइराला प्रखर क्यान्सर अस्पतालमा पहिलो पल्ट दुरबिन प्रबिधीबाट पाठेघर र डिम्बाशयका क्यान्सरका बिरामीहरुको अप्रेशन भएको छ ।
काठमाण्डौबाट आएका गाइनोकोलोजिकल अंकोलोजिष्ट (महिला क्यान्सर रोग बिशेषज्ञ ) चिकित्सकलाई ल्याएर क्यान्सर अस्पतालले चिकित्सकहरुको दुरबिन प्रबिधीबाट स्तन र पाठेघरमा क्यान्सर भएका बिरामीको अप्रेशन सेवा सुरु गरेको हो ।
काठमाण्डौबाट आएका महिला क्यान्सर रोग बिशेषज्ञ डाक्टर सुरेश कायस्थ र बिनम्र सिग्देलसहित नेपालगन्ज मेडिकल कलेज, भेरी अस्पताल र क्यान्सर अस्पताल खजुराका ८ बिशेषज्ञ चिकित्सकहरुको टोलीले पाठेघर र डिम्बाशयमा क्यान्सर भएका बिरामीहरुको अप्रेशन गरेका छन् ।
बिरामीको अवस्था हेरेर सम्भब भएसम्म दुरबिन प्रबिधिबाट र सम्भव नभएका बिरामीहरुको चिरेरै अप्रेशन गरेर उपचार गर्ने गरिएको छ ।
क्यान्सरका बिरामीहरुको उपचार सेवालाई बिस्तार गर्ने उद्देश्यले काठमाण्डौबाट बिशेषज्ञ चिकित्सकहरु ल्याएर दुरबिन प्रबिधिबाट क्यान्सरका बिरामीको अप्रेशन सहितको उपचार सेवा सुरु गरिएको अस्पतालका प्रमुख डाक्टर कृष्ण आचार्यले बताए ।
सरकारी अस्पतालमा अत्याधुनिक प्रबिधिबाट उपचार सेवा पाएपछि बिरामीहरु लाभान्वित भएका छन् ।
पछिल्ला दिनहरुमा महिलाहरुको प्रजनन अंगमा देखिएको क्यान्सर रोगको दुरबिन प्रबिधिबाट अप्रेशन गर्ने क्रम बढ्दै गएको छ । दुरबिन प्रबिधिबाट गरिने अप्रेशन सहज र प्रभावकारी हुने महिला क्यान्सर रोग बिशेषज्ञ डाक्टर सुरेश कायस्थले बताए ।
क्यान्सर अस्पतालले शुरु गरेको अप्रेशन सेवाबाट लुम्बिनी, कर्णाली र सुदूरपश्चिम प्रदेशका क्यान्सरका बिरामीहरुहरुले सहज रुपमा उपचारका सेवा पाउन थालेका छन् ।
गलगाँडको पनि शल्यक्रिया
बाँके खजुरा गाउँपालिका–२ गौघाटकी ३६ वर्षीया बालकुमारी खत्रीको गलगाँडको सफलतापूर्वक शल्यक्रिया गरिएको ईएन्टी सर्जन डा आनन्द कर्णले जानकारी दिनुभयो । खत्री विगत १० वर्षदेखि गलगाँडको समस्याबाट पीडित हुनुहुन्थ्यो । पछिल्ला दिनहरुमा सास लिन र निल्न कठिनाई हुँदै गएको थियो ।
‘विस्तारै गलगाडको साइज बढ्दै गएपछि उहाँलाई निकै गाह्रो हुन थाले छ ईएन्टी सर्जन कर्णले स्वास्थ्य पेजसँग भन्नुभयो–‘खजुरा क्यान्सर अस्पतालमा यति ठूलो साइजको शल्यक्रिया पहिलो पटक ग¥यौं । विरामीको स्वास्थ्य अवस्था अहिले नर्मल छ ।’
खत्रीको थाइराइड ग्रन्थीको आकार बढेर १०(८ सेन्टिमिटर पुगेको थियो । ईएन्टी सर्जन कर्णको नेतृत्वमा अर्का ईएन्टी सर्जन रवी स्वाँर, एनेस्थेसियोलोजिष्ट डा कृष्ण आचार्यलगायतको टिमले शल्यक्रिया गरेको हो ।