बाँके : वडा प्रहरी कार्यालय नेपालगन्जले दुर्लभ बन्यजन्तुको सूचीमा रहेको रेडपाण्डाको छालासहित सोमबार एकजनालाई पक्राउ गरेको छ । बिहान ११ बजे नेपालगन्ज वडा नम्बर ११ सदरलाईनस्थित भगवती ज्वाला होटलबाट रेडपाण्डाको छाला सहित जुम्ला तातोपानी गाउँपालिका १ का धिरज महतलाई प्रहरीले पक्राउ गरेको हो ।
भगवती ज्वाला होटलमा अवैध वन्यजन्तु (रेडपाण्डाको छालाको ) कारोबार भईरहेको भन्ने सुचनाको आधारमा जिल्ला प्रहरी कार्यालय बाँके तथा मातहत वडा प्रहरी कार्यालय नेपालगन्जबाट खटिएको प्रहरी टोलीले उक्त होटलको कोठा चेकजाँच गर्ने क्रममा रेडपाण्डाको छाला बरामद गरेको हो ।
झोला भित्र रहेको पुच्छर सहितको दुर्लभ वन्यजन्तु रेडपाण्डाको छाला थान १ फेला पारी बरामद गरी बरामद रेडपाण्डाको छाला सहित महतलाई आवश्यक कारबाहीको लागि डिभिजन बन कार्यालय बाँकेमा बुझाईएको छ ।
