काठमाडौं, १९ भदौ । नेपाल एशोसिएसन अफ टूर एण्ड ट्राभल एजेन्ट्स (नाट्टा)ले नेपाल भ्रमण वर्ष २०२० सफल पार्नका लागि संस्कृति पर्यटन तथा नागरिक उड्ययनमन्त्री योगेश भट्टराईलाई ७ बुँदे सुझाव दिएको छ । नाट्टाले पूर्व अध्यक्षहरुलाई समेत साक्षी राखेर मन्त्री भट्टराईलाई भ्रमण वर्ष सफल पार्ने सुझावहरु प्रस्तुत गरेको हो ।
मन्त्री समक्ष सुझाव पेश गर्दै अध्यक्ष पाण्डेले अन्य देशहरुले जस्तै बढ्दो सूचना प्रबिधिको विकास अनुसार पर्यटकहरुका लागि अनलाइन भिसा शुल्कसहित उपलब्ध गराउने व्यवस्था मिलाउन मन्त्रीलाई अनुरोध गरे । अध्यक्ष पाण्डेले अध्यागमन सेवामा एक्सप्रेस काउन्टर खोल्न र अध्यागमन अधिकृतहरु तालिम प्राप्त र उपयुक्त व्यवहार भएको राख्नुपर्नेमा जोड दिए ।
उनले निर्माणाधिन अवस्थामा रहेको गौतमबुद्ध विमानस्थल चाँडो भन्दा चाँडो सञ्चालनमा ल्याउन अन्तर्राष्टिय कम्पनीहरुसँग जिटुजी गराउनका निम्ति नाट्टाले पनि सहयोग गर्ने बताए । उनले भ्रमण वर्ष सफल बनाउन निजी क्षत्रको तर्फबाट पनि विभिन्न समिति निर्माण गरेर काम अघि बढाउने प्रतिवद्धता व्यक्त गरे ।
यस्तै पाण्डेले विदेशस्थित नेपाली दूतावास, कन्सुलेट तथा कुटनैतिक मिशनहरुलाई परिचालन गराई भ्रमण वर्षमा कति पर्यटक पठाउन सक्ने हो त्यसको प्रतिवद्धता माग्न सुझाव दिए । उनले त्रिभुवन विमानस्थललाई बुटिक एयरपोर्ट गराउने भनिएकोमा यथाशिघ्र सो कामलाई पूर्णता दिई विमानस्थलकको सौन्दर्यकरण गर्न समेत माग गरे । उनले ७ बुँदे सुझाव पत्र पढेर मन्त्रीलाई हस्तान्तरण गरेका थिए । नाट्टाको सुझावहरु ग्रहण गर्दै मन्त्री भट्टराईले कार्यान्वयनको प्रतिबद्धता जनाएको नाट्टाले जनाएको छ । मन्त्री भट्टराईले नेपाल वायुसेवा निगमले सुरु गरेको नेपाल–जापान सीधा हवाइ सेवाकाका लागि निजी क्षेत्रले सहयोग गर्ने विश्वास व्यक्त गरे ।
यस्ता छन् सुझावः
१. डिजल इन्धन र एलपी ग्यासमा दिई आएको कर फिर्तालाई निरन्तरता दिइनु पर्ने
२. त्रिभुवन अन्तरराष्ट्रिय विमान स्थल २४ सै घण्टा खोलिनुपर्ने
३. बैकल्पिक अंतराष्ट्रिय विमानस्थलहरु निजगढ, पोखरा र भैरहवामा निमाणाधीन अवस्थामा रहेको विमानस्थलको निमार्ण छिटो गर्नुपर्ने
४. नेपाल वायूसेवा निगमले ६ वटा न्यारो बडी तथा ४ वटा वाइड बडी भित्र्याउनु पर्ने
५. अनलाईनबाट हुने हवाई बुकिङ्गलाई रोक्नुपर्ने
६. विमानस्थलको कर्मचारिको व्यवहार सुधार गर्नुपर्ने र सबै काउन्टरहरु खोल्नुपर्ने
७. त्रिभुवन विमानस्थलमा ट्याक्सी जस्ता सवारीहरु विमानस्थलबाट टाढा राख्नु नहुने