नेपालगन्ज । भारतबाट अवैध रूपमा नेपाल भित्र्याउँदै गरेका ब्रोइलर कुखुरा बाँके प्रहरीले बरामद गरेको छ ।
जिल्ला प्रहरी कार्यालय बाँकेबाट खटिएको प्रहरी टोलीले अवैध रूपमा ल्याइएका तीन सय किलोग्राम ब्रोइलर कुखुरा राप्तीसोनारी गाउँपालिका– ४ कुम्भरस्थित जंगलनजिकबाट बरामद गरेको हो।
कुखुरासहित तस्करी गर्न प्रयोग गरिएको तीनवटा मोटरसाइकलसमेत नियन्त्रणमा लिएको बाँके प्रहरी प्रवक्ता डिएसपी नारायण डाँगीले जानकारी दिए। भारतबाट अवैध रूपमा कुखुरा ल्याउँदै गर्दा प्रहरीलाई देखेपछि तस्करहरू कुखुरा छाडेर भागेका उनले बताए।
बरामद गरिएका कुखुरा आवश्यक कारबाहीका लागि जिल्ला प्रहरी कार्यालयमा ल्याइएको छ । तस्करले ल्याउँदै गरेका कुखुरा केही मरेका फेला परेको डिएसपी डाँगीले बताए।