बाँके : प्याब्सन नेपालगन्ज उपमहानगरपालिका समितिको आयोजनामा शुक्रबारदेखि दुईदिने नेपालगन्जस्तरिय महिला तथा पुरुष बुद्धिचाल प्रतियोगिता शुरु भएको छ । शनिबारसम्म चल्ने प्रतियोगिता मोडल एकेडेमीमा शुरु भएको हो । पहिलो दिन दुई चरणका खेलहरुमा भएकोमा महिला तर्फ अस्मिता रावल, दिप्ती ढकाल र मिलि किरण पुनले समान २ अंक जोड्दै अग्र स्थानमा रहेका छन ।
उनीहरुलाई १.५ अंकका साथ एकता चौधरी र मेघा श्रेष्ठले पछ्याई रहेका छन । पुरुष तर्फ प्रज्वल देवकोटा, असिम बोहरा, प्रकाश बोहरा, निष्पक्ष जंग शाह र कृशु चौधरी समान २ अंकका साथ अग्रस्थानमा रहन सफल भएका छन । समितिका सचिव मान बहादुर थापाले संचालन गरेको उदघाटन समारोहको सभापतित्व समितिका अध्यक्ष विकास बज्राचार्यले गरेका थिए ।
बाँके जिल्ला खेलकुद विकास समितिका अध्यक्ष आतंक बस्नेत, बाँके जिल्ला बुद्धिचाल संघका अध्यक्ष धनराम वली लगाएतले शुभकामना मन्तव्य दिएका थिए । नेपालगन्जका २० वटा स्कुलले सहभागिता जनाएको उक्त प्रतियोगितामा प्रमुख निर्णायकको भूमिकामा पशुपति नाथ योगी र सहायक निर्णायक मदन वली रहेका छन । सो प्रतियोगितामा २० पुरुष र १५ महिला खेलाडी सहभागी रहेका छन । बाँकी रहेका ३ चरणका प्रतिस्पर्धाहरु शनिबार विहान ८ः १५ बजेबाट सुचारु हुनेछन ।
