नेपालगन्ज, ११ जेठ : पूर्वप्रधानमन्त्री एवं नेकपाका बरिष्ठ नेता माधवकुमार नेपालले सरकारले राम्रो काम गर्न खोजेको बताएका छन् । ‘केही गरेन भन्ने कुरा साँचो होइन । राम्रा काम पनि भएका छन् । त्रुटी पनि भएका होलान्’ प्रेस संगठन बाँकेले शनिबार नेपालगन्जमा आयोजना गरेको पत्रकार सम्मेलनमा बरिष्ठ नेता नेपालले भने–‘ यि दुवैथरी कुरालाई मनन गरेर आगामी बजेट ल्याउनुपर्छ ।’
काम गरेर देखाउनेलाई मात्र जनताले निर्वाचन जिताउने भन्दै नेता नेपालले यस वर्षको बजेटबाट जनताले धेरै अपेक्षा गरेको उल्लेख गरेका छन् । भारतमा हालै मात्र सम्पन्न लोकसभाको निर्वाचनको प्रसंग निकाल्दै नेता नेताले राम्रो काम गरेर देखाएकाले भारतीय जनता पार्टी निर्वाचन जितेको बताए ।
