कोहलपुर ३ असोज – बोइलर कुखुराको चल्लालाई कालो मेहन्दी लगाएर ‘लोकल’ भन्दै महङ्गोमा विक्री गर्ने भारतीय नागरिकलाई इलाका प्रहरी कार्र्यालय कोहलपुरले आज शुक्रवार पक्राउ गरेको छ । सेतो चल्लामा कालो मेहन्दी लगाउँदै गर्दा कोहलपुरमा भारत रामपुरका मोहमद नाजिर र सरिफ अलीलाई पक्राउ गरेको इप्रका कोहलपुरका डिएसपी हेमराज शाहीले जानकारी दिए ।
कालो मेहन्दी लगाउँदै गरेको र लगाइसकेको गरी सयवटा जति चल्ला बरामद गरेको छ । ‘बोइलरको भन्दा लोकल वा गिरिराजको चल्ला महङ्गोमा विक्री हुनेरहेछ । आफ्नो फाईदाका लागि गलत काम गर्नेलाई आज पक्राउ गरेका छौं ।’– डिएसपी सिंहले बताए । उक्त चल्ला नारायणगढको पोल्ट्री फर्मबाट ल्याइएको थियो । खुद्रारुपमा विक्री गर्न ल्याइएको चल्लामा भारतीय नागरिकले बदमासी गरेका हुन ।