होमलोन लिँदा बैंकमा पेश गर्नुपर्छ यी कागजात


बैंक र वित्तीय संस्थाहरूले निश्चित मापदण्डभित्र रहेर घरजग्गा खरिद र निर्माणका लागि कर्जा प्रदान गर्छन् । ऋण लिन तपाईंले बैंकले तोकेका निश्चित प्रक्रिया पूरा गर्नुपर्छ । बैंकबाट ऋण लिनका लागि आफ्नो अचल सम्पत्ति धितो राख्नुपर्ने हुन्छ । त्यसबाहेक ऋणी र व्यक्तिगत जमानत बस्नेको नियमित आम्दानीको स्रोत हुनुपर्छ । एक वर्ष अवधिको बैंक स्टेटमेन्ट पनि पेश गर्नुपर्ने हुन्छ ।

नेपाल राष्ट्र बैंकको पछिल्लो व्यवस्थाअनुसार आम्दानीअनुसार सरकारलाई आयकर बुझाएको प्रमाण (करचुक्ता प्रमाणपत्र) पनि पेश गर्नुपर्ने हुन्छ । नियमित रूपमा आयकर तिर्नेहरूले सहजै रूपमा करचुक्ता प्रमाणपत्र लिन सक्छन् । वार्षिक रूपमा आम्दानीको करचुक्ता प्रमाणपत्र आन्तरिक राजस्व विभाग मातहतका कार्यालयले दिन्छन् । त्यसपश्चात् ऋण लिने ग्राहकले बैंकद्वारा तोकिएको कर्जाको माग आवेदन फारम भर्नुपर्ने हुन्छ ।


ऋणको आवदेनसँग पेश गर्नुपर्ने कागजात

  • कर्जा लिने व्यक्तिको नागरिकता
  • पासपोर्ट साइजको फोटो
  • ऋण लिने व्यक्ति र व्यक्तिगत जमानत दिने व्यक्तिको समेत आयस्रोतसम्बन्धी विवरण
  • वार्षिक आम्दानीको कर तिरेको करचुक्ता प्रमाणपत्र
  • आयस्रोत प्रमाणपत्र (तलब, व्यवसायको अडिट रिपोर्ट, घरभाडा)
  • व्यवसाय दर्ता प्रमाणपत्र
  • बैंकबाट कर्जा लिनको लागि राखिने धितो (पोपर्टी)को चार किल्ला प्रमाणित भएको लालपुर्जा
  • सम्पत्तिको बाटो खुल्ने कागजात
  • सम्पत्तिको कर तिरेको रसिद (जुन वडा कार्यालयमा पाइन्छ)
  • जग्गाको ब्लु प्रिन्ट, ट्रेस
  • धितो बन्धक राखिने सम्पत्तिमा घर भएमा घर निर्माणका लागि लिएको इजाजत पत्र
  • घरको स्थायी नक्सा पास र निर्माण सम्पन्न भएको प्रमाणपत्र
  • कानुनी रूपमा दर्ता भएका संघसंस्थामा काम गरिरहेका कर्मचारी वा तलबी व्यक्ति भएमा तलबसम्बन्धी कागजात, घरभाडामार्फत आम्दानी गर्नेहरूको हकमा घरभाडाको सम्झौतापत्र र भाडा आउने घरको लालपुर्जाको प्रमाणपत्र
  • वैदेशिक रोजगारीबाट आम्दानी गर्नेको हकमा भिसा लागेको पासपोर्टको प्रमाण, तलबी कागजात, विदेशमा तलब राखिने बैंकको स्टेटमेन्ट र विदेशबाट नेपालमा पैसा पठाएको कागजात
  • बैंकको नीतिअनुसार अन्य कागजपत्र

जमानीकर्ताले प्रस्तुत गर्नुपर्ने कागजात (आवश्यक भएमा) 

  • व्यक्तिगत सम्पत्ति र दायित्व विवरण
  • नागरिकता वा पासपोर्ट
  • निवास प्रमाण
  • जमानत बस्ने व्यक्तिको काम गर्ने ठाउँको ठेगाना र विवरण
  • करचुक्ता प्रमाणपत्र
  • बैंक स्टेटमेन्ट
प्रकाशित मितिः     6:33:10 AM  |