नेपालगन्ज शिक्षण अस्पतालका कर्मचारीलाई तुरुन्त पारिश्रमिक देउ, घाटाको बहानाबाजी नगर !


नेपालगन्ज :  नेपालगन्ज मेडिकल कलेज शिक्षण अस्पताल पश्चिमकै सबैभन्दा ठुलो अस्पताल हो । नेपालगन्जलाई स्वास्थक्षेत्रको हबका रुपमा परिचित बनाउन यो अस्पतालको भूमिका महत्वपूर्ण छ ।

संयौ बिरामीले नेपालगन्ज मेडिकल कलेजकै कारण सर्बसुलभरुपमा सेवा पाएका छन् । तर बिडम्बना यही अस्पतालमा कार्यरत कर्मचारीले भने पारिश्रमिक नपाएको भन्दै बर्षमा कुनै न कुनै महिना आन्दोलन गर्नेपरिरहेको छ । कर्मचारीको आन्दोलनपछि व्यवस्थापन पक्षबाट आउने बनिबनाउ जवाफ हो, अस्पताल घाटामा छ ।

यतिबेला फेरी स्वास्थ्यकर्मीहरु आन्दोलनमा छन् । स्वास्थ्यकर्मी तथा कर्मचारीहरु तलब भत्ताको माग गर्दै आन्दोलित बनेका छन् । अस्पतालमा कार्यरत स्वास्थ्यकर्मी र कर्मचारीले ३ महिनादेखि तलब भत्ता नपाएको, डाक्टरहरुले चार महिनाकै तलब नपाएको, नर्सिङ स्टाफ र कर्मचारीहरुले कोभिड भत्ता र खाजा भत्ता पनि नपाएकोे भन्दै उनीहरु आन्दोलनमा उत्रिएका छन् ।

शुक्रबार र शनिबार उनीहरुले अस्पतालमा शान्तिपूणर् प्रदर्शनसमेत गरेका छन् । उनीहरुले शनिबार अस्पताल परिसरमा धर्ना दिँदै आफ्ना माग पूरा गराउन नाराबाजीसमेत गरेका थिए ।

तलबको माग गर्दा अस्पताल प्रशासनले उल्टै धम्क्याएपछि आन्दोलनमा उत्रिनुपरेको लर्ड बुद्ध एजुकेशन ऐकेडेमी कर्मचारी संगठनका उपाध्यक्ष सुमन गिरीले बताइन् । कर्मचारीहरुले प्रशासन, लेखा शाखा र एमडी कक्षमा तालाबन्दी गरेका छन् ।


आन्दोलनपछि पनि अस्पतालले माग सम्बोधनमा चासो देखाउनुको साटो धम्क्याउन खाजेको भन्दै उनीहरु उनीहरु थप आक्रोसित बनेका छन् ।  गिरीले कोरोना महामारीमा जोखिम मोलेर खटिएका स्वास्थ्यकर्मीप्रति अस्पतालले अन्याय गरेको बताइन् ।

कर्मचारीहरु अस्पतालले तलब भत्ता मात्रै ढिलो गरेको नभई सामाजिक सुरक्षा कोषमा स्वास्थ्यकर्मी र कर्मचारीको तलबबाट ११ प्रतिशत रकम कट्टा गरिए पनि कम्पनीको तर्फबाट २० प्रतिशत थप गरेर दाखिला गर्नुपर्नेमा त्यसो नगरिएकोसमेत बताउँछन् । १६ महिनादेखि सामाजिक सुरक्षा कोषमा रकम दाखिला नभएको पनिदावी गरिएको छ  ।

अस्पताल प्रशासनले भने साउन पहिलो सातासम्म तलवभत्ता दिने बताएको छ । तर, उपाध्यक्ष गिरी यसपटकको आन्दोलन तलबका लागि मात्रै नभएको बताउँछिन् । हाम्रा थुप्र्रै सुविधाहरु अस्पतालले दिन सकेको छैन । तर प्रशासन ती सुविधाका सम्बन्धमा कुरा गर्न चाहिरहेको छैन । यसपटकको आन्दोलन सबै अधिकारहरुको सुनिश्चितता नभएसम्म जारी रहने छ,’ गिरीले भनिन् । आइतबारबाट आन्दोलन थप चर्किने गिरीले बताइन् । अस्पतालको नियमित उपचारम असर नपर्नेगरी आन्दोलन झन् कडा हुँदै जाने गिरीको भनाइ छ ।

स्वास्थ्यकर्मी तथा कर्मचारीहरुले एकमुष्ट तलवभत्ता पाउनु पर्ने माग गर्दै आएका छन् । अस्पतालले भने एकमुष्ट तलब भत्ता दिने अवस्था नरहेको बताउँदै आएको छ । अस्पतालका उपनिर्देशक श्याम शर्मा एक हप्ताभित्र एक महिनाको तलबभत्ता उपलब्ध गराइने बताउँछन् । अस्पताल घाटामा रहेको भन्दै एकमुष्ट तलबभत्ता दिन सक्ने अवस्थामा अस्पताल प्रशासन नरहेको शर्माको तर्क छ । कर्मचारीहरु अस्पताल घाटामा छ भनेर कर्मचारीहरुको तलबसमेत नदिइनु घोर अन्याय भएको बताउँछन् । व्यवस्थापन पक्षले कुनै पनि बहानाबाजी नगरी तुरुन्त पारिश्रमिक उपलब्ध गराउन आवश्यक छ ।

प्रकाशित मितिः     २ श्रावण २०७८, शनिबार २१:१०  |
error: Content is protected !!