बाँकेमा १३२ केभी प्रसारण लाइन विस्तारले प्रभावित हुनेको पीडा सरकारसम्म पुग्यो


नेपालगन्ज – निर्माणाधीन कोहलपुर–सुर्खेत १३२ केभी प्रसारण लाइन विस्तारको योजना कार्यान्वयनमा आउँदा बाँकेका कयौं बस्तिहरु प्रभावित हुने भन्दै यहाँ जनप्रतिनिधिले त्यसको बिकल्पमा नयाँ रुट तयार गर्न सरकारको ध्यानार्कषण गराएका छन् ।

बांके क्षेत्र न.१ प्रतिनिधिसभा सांसद महेश्वर गहतराज “अथक“, क्षेत्र नं. ३ का नन्दलाल रोकाय, लुम्बिनी प्रदेश सभा सदस्य आइ.पि.खरेल बैजनाथ गाउपालिका अध्यक्ष मानबहादुर रुचाल सहितको टोलीले सोमवार उर्जा जलस्रोत तथा सिचाइ मन्त्री पम्फा भुसालसंग सामुहिक भेट गरेर स्थानीयको चिन्ता सम्बोधन गर्न माग गरेका थिए ।

सांसद अथकले स्थानीय नागरिकलाई बिस्थापित नहुने गरी प्रसारण लाइन बनाउने बिकल्प खोज्न माग गरिएको छ र त्यसका लागि मन्त्री भुषालले बृहद छलफल गर्ने आश्वासन दिएकी छन् । सांसद अथक भन्छन्–‘योजनाका बिषयमा कुनै बिवाद भएन । तर संयौ नागरिक र पर्यटकीयक्षेत्र प्रभावित हुने गरी जुन रुट तय गरिएको छ त्यसको बिकल्प दिनुपर्छ भन्ने माग गरेका छौं ।’ छलफल जारी रहेकाले अझै केही दिन बाँकेका जनप्रतिनिधि काठमाण्डौंमै रहने छन् ।

आयोजना प्रमुख रविकुमार चौधरीले विभागीय मन्त्री नहुँदा काममा ढिलाइ भएको जनाउँदै मन्त्रिपरिषद् बैठकले स्वीकृत गरेपछि रुख कटानका लागि बोलपत्र आह्वान, जग्गाको मुआब्जालगायत प्रक्रिया शुरु गरिने बताए । “यति ठूलो सङ्ख्या रुख कटान गर्न समय लाग्छ, अबको एक वर्षभित्र प्रसारण लाइन निर्माण गरिसक्नुपर्नेछ”, उनले भने, “रुख कटानमा जति ढिलाइ भयो, त्यति नै प्रसारण लाइन विस्तारमा समय लाग्छ ।” रुख कटानमा ढिलाइ हुँदा जग्गाको मुआब्जा वितरणदेखि प्रसारण लाइन निर्माणको काम प्रभावित हुने चौधरी बताउँछन् ।


नेपाल विद्युत् प्राधिकरणको ३६ औँ वार्षिकोत्सवका अवसरमा आयोजनाले कोहलपुरबाट प्रसारण लाइनको टावर निर्माण शुरुआत गरेको थियो । करिब रु ७० करोडका लागतमा भारतीय कम्पनी आरएस इन्फ्राप्रोजेक्टले प्रसारण लाइन निर्माण ठेक्का लिएको थियो । गत वर्ष असारमा ठेक्का सम्झौता भए पनि कम्पनीले निर्माण अघि बढाएको छ । बाउन्न किमी दूरी रहेको सो प्रसारण लाइनका लागि डबल सर्किटअन्तर्गत १६१ टावर निर्माण गर्नुपर्ने छ ।

विसं २०४५ मा निर्मित ३३ केभी प्रसारण लाइनका कारण कर्णालीमा ‘अनियमित विद्युत्’ ठूलो समस्याका रुपमा छ । भोल्टेज कम हुने, सामान्य वर्षा र हावाहुरीमै खम्बा ढल्नेजस्ता समस्याले यहाँ उपभोक्ताले हैरानी खेप्नुपरेको छ । सो आयोजना निर्माण सम्पन्न भएमा सबै समस्या हट्ने देखिन्छ । आयोजना बाँकेको कोहलपुर सब–स्टेशनबाट प्रारम्भ भई सुर्खेतको वीरेन्द्रनगरस्थित सब–स्टेशनमा पुगेर टुङ्गिने छ ।

आयोजनाका अनुसार प्रसारण लाइनका अधिकांश क्षेत्र बाँके राष्ट्रिय निकुञ्ज र बर्दिया राष्ट्रिय निकुञ्ज तथा मध्यवर्ती क्षेत्रमा पर्छ । प्रसारण लाइनको ७० दशमलव ५४५ भाग वन क्षेत्र, १५ दशमलव १३५ खेतीयोग्य, दुई दशमलव २६५ बाँझो जमिन तथा ११ दशमलव ६५ अन्य भागले ओगटेको छ । सो आयोजनाबाट बाँकेका कोहलपुर नगरपालिका र बैजनाथ गाउँपालिका, बर्दियाका बाँसगढी नगरपालिका तथा सुर्खेतका भेरीगङ्गा, लेकबेँसी र वीरेन्द्रनगर नगरपालिका प्रभावित हुनेछन् ।

प्रकाशित मितिः     २९ भाद्र २०७८, मंगलवार ०७:४३  |
error: Content is protected !!