नेपालगन्ज । बिहीबार नेपालगंज – १२ बेलासपुरबाट प्रहरीले हुण्डी कारोबार संलग्नलाई नगद रकम सहित पक्राउ गरेकाे छ ।
गोप्य सुचनाको आधारमा जिल्ला प्रहरी कार्यालय बाँकेकाे टोलीले बेलासपुर स्थित रहेको तारा कुमारी विसीको घरमा भडामा रहेको नविल रेफ्रिजिरेटर एण्ड एयर कन्डिशन वर्कशप नामको टीभी फ्रीज मर्मत गर्ने पसलमा छापा मारेकाे थियाे ।
साे क्रममा नगद चौबीस लाख बैसठ्ठी हजार तीन सय पन्ध्र हरहिसाव राखेको कपी थान १, सानो नोट बुक थान १, बिभिन्न व्यक्तिको नाममा विभिन्न बैंकमा पैसा जम्मा गरेको भौचरहरु समेत बरामद गरी चार जनालाई पक्राउ गरी आवश्यक अनुसन्धान भइरहेको डिएसपी नारायण डाँगीले जानकारी दिए ।
पक्राउ पर्नेहरूमा नेपालगन्ज-१८ बस्ने वर्ष २९ को राजेश भुजु श्रेष्ठ, वर्ष २५ को सोयब कादरी हलवाई, कोहलपुर- ७ बस्ने वर्ष २९ को निम बहादुर बोहरा, कन्चनपुर भिमदत्त-७ घर भई हाल जिल्ला बाँके नेपालगंज -३ बस्ने वर्ष ३० को राहुल देवल रहेका छन् ।