नेपालगन्ज आइसीपी : लट्किन्छ काम, बढ्छ लागत


 

नेपालगन्ज । ‘आइसीपिकाे भब्य पूर्वाधार बन्याे । याे हाम्रो लागि खुसीको कुरा हाे ! तर त्याे अनुसार आयातनिर्यातकाे काम चुस्तदुरुस्त हुन सकेकाे छैन ।

पहिले एक दिनमा हुने काम अहिले ठ्याक्कै दुई दिन लाग्छ,खर्च पनि बढेकाे छ ।’- नेपालगन्जका एक जना प्रतिष्ठीत उद्योगीले एकीकृत भंसार जाँचजाैकीमा भइरहेका कामकाे ढिलासुस्तीका बिषयमा सुनाए गुनासाे ।

लामाे प्रतिक्षापछि नेपालगन्जस्थित एकीकृत जाँच पोस्ट (आइसिपी) सञ्चालनमा आयो । नेपाल-भारत सीमामा भब्य पूर्वाधार तयार त भयाे तर उद्योगी व्यवसायीले ‘खासै ठूलो परिवर्तन’महसुस गर्न सकेका छैनन् । उल्टाे लागत बढेकाे ‘जाँचपास’ समय दाेब्बर भएको अनुभव गरेका छन् । नेपालतिर मात्रै होइन भारततिर अझ काम ‘लट्काउने’ गरेकाे र त्यसले पार्किङ शुल्क बढ्ने गरेकाे उद्योगीहरु सुनाउँछन् ।

‘ लागत बढेकाे र काममा ढिलासुस्ती भएको गुनासा आएका छन् । याे बिषयमा हामीले सराेकारवाला निकायकाे कानसम्म पुर्‍याएका छाैं ।’ – नेपालगन्ज उद्योग वाणिज्य संघका बरिष्ठ उपाध्यक्ष चिरञ्जीवी ओलीले भने,-‘हाम्रो ठाउँमा यति भब्य पुर्वाधार बन्नु ठूलै कुरा त हाे तर जति भब्य पूर्वाधार उति काम प्रभावकारी हुनुपर्नेमा त्याे हुन सकेकाे छैन ।’

आइसीपी बनेपछि पहिले जस्ताे सडकमा असरल्ल जथाभावी मालवाहक गाडी राख्नुपर्ने झन्झट अन्त्य भएको छ । मालसामान चाेरी हुने डर पनि हटेकाे छ । ठूलै क्षेत्रफलमा आइसीपि बनेपछि सहज ढंगले काम गर्ने वातावरण बनेकाे छ । तर त्यसाे हुँदाहुँदै पनि लागत बढ्ने र ढिलासुस्ती हुने हुनाले उद्योगी वाक्कदिक्क रहेका छन् ।

नेपाल सरकारले झन्डै दस कराेड जग्गाकाे मुआब्जामा र भारत सरकारले दुई अर्व ३५ कराेड खर्चेर पूर्वाधार निर्माण गरेकाे हाे ।

८७ बिघा क्षेत्रफल ओगटेको आइसिपी निर्माणका लागि सरकारले ०६६/६७ मै नौ करोड ३९ लाख रुपैयाँ मुआब्जा दिएर जग्गा अधिग्रहण गरेको थियो । २६ फेब्रुअरी ०२१ देखि निर्माणको काम सुरु भएको आइसिपी निर्माणमा भारत सरकारको दुई अर्ब ३५ करोड रुपैयाँ खर्च भएको छ । भारत सरकारले ९ जुन २०२२ मा निर्माण सक्ने गरी सम्झौता गरे पनि कोरोना महामारीका कारण काम गर्न नसकेको भन्दै निर्माण कम्पनीले थप समय मागेको थियो । सन् २००५ मा दुई देशका अधिकारीले एमओयूमा हस्ताक्षर गरेपछि निर्माण सुरु भएको थियो ।

आइसिपी नेपालगन्ज र भारतको रुपैडिहामा अवस्थित छ । नेपालतिर ८७ बिघामा फैलिएको आइसिपीमा पार्किङ, गोदाम, भन्सार भवन, क्वारेन्टिन भवन, नेपाल इन्टरमोडल यातायात विकास समितिको कार्यालय, बैंक, भन्सार एजेन्ट, नापतौल, नेपाल प्रहरी र सशस्त्र प्रहरीलगायतका लागि पूर्वाधार निर्माण भएका छन् ।

प्रकाशित मितिः     १९ चैत्र २०८१, बुधबार ०९:०३  |