नेपालगन्ज । काठमाडौं महानगरपालिकाका प्रमुख प्रशासकीय अधिकृत सरोज गुरागाईं ३ महिना १४ दिनपछि आज कार्यालय पुगे ।
संघीय मामिला तथा सामान्य प्रशासन मन्त्रालयले गुरागाईंलाई काठमाडौं महानगरपालिकामै हाजिर गर्ने वातावरण बनाइदिनु भन्दै एक महिनाअघि पत्र पठाएको थियो । तर, महानगरपालिकाले उनलाई हाजिर गराएको थिएन ।
आज पनि गुरागाईंलाई हाजिर हुन नदिन महानगरपालिकाका मेयर बालेन्द्र शाह (बालेन) ले महानगर प्रहरी परिचालन गरेका थिए ।
तर, उपमेयर सुनिता डंगोल, अधिकांश कार्यपालिका सदस्य, वडाध्यक्षहरू र कर्मचारीहरूको साथले गुरागाईं कार्यालय प्रवेश गरेर हाजिर गर्न सफल भए । यससँगै उनलाई हाजिर हुन नदिने बालेनको प्रयास असफल भएको छ ।
कार्यालय प्रवेश गरेपछि पनि गुरागाईं कार्यकक्षमा प्रवेश गर्न खोज्दा ढोकामा ताला लगाइएको थियो । गुरागाईंलाई कार्यकक्षमा प्रवेश गर्न रोक लागाएपछि बोर्ड बैठक हलमा उपमेयर डंगोल, वडाध्यक्षहरूको बैठक बस्यो । अनौपचारिक बैठकमा डंगोलले बालेनको आलोचना गरिन् । ‘कसैको मनमुटाव होला जनप्रतिनिधि भएकाले हामी आम नागरिकको सेवामा तल्लिन हुनुपर्छ,’ उनले भनिन् ।
हरेक घटनाक्रममा आफूहरू जानकार रहेको भन्दै डंगोलले कोठामा बसेर निर्देशन नदिन बालेनलाई सचेत गराइन् । ‘मन्त्रालयबाट पठाएपछि प्रमुख प्रशासकीय अघिकृत हाजिर गर्न आउनु भएको छ । उहाँ हाजिर गर्न आउँदा यो झडपको अवस्था हुनु राम्रो कुरा होइन । कर्मचारी–कर्मचारीबीच लडाईं हुनु पनि राम्रो होइन,’ उनले भनिन् ।
प्रमुख प्रशासकीय अघिकृत गुरागाईं दोषी देखिए कारबाही हुनुपर्ने पक्षमा आफू पनि रहेको डंगोलले बताइन् । तर, अहिले उनलाई दोषी प्रमाणित गर्न नसकेको डंगोलको भनाइ छ । ‘त्यसैले उहाँलाई हाजिर गर्ने व्यवस्था गर्नुपर्छ । हजारौँ कर्मचारी र लाखौँ काठमाडौंवासीले दुःख पाएका छन् । क्यान्सरपीडितलाई पनि हामीले पैसा दिन सकेका छैनौँ । अझै छानबिन गर्नुपर्ने भए गर्ने हो । तर, यो पीडामा राख्नु हुँदैन,’ डंगोलले भनिन्, ‘यो तमासा हामीले हेर्नुपर्ने ? मेयरको आदेश हो भने मेयर अघि आउनुपर्छ । होइन भने कोठामा बसेर आदेश दिन पाइँदैन । पहिला आजको विषय समाधान गर्छौं । त्यसपछि बोर्ड बैठक बस्छौँ । आजका लागि यो समस्या समाधान गर्नुपर्छ ।’
नगर प्रहरी प्रमुख राजु पाण्डेलाई डंगोलले ताला किन लगाएको भनेर प्रश्न गरेकी थिइन् । तर, उनले गोलमटोल जवाफ दिएको एक वडाध्यक्षले बताए । उपप्रमुख डंगोलले र्याखर्याखी पारेपछि भने मेयरको मौखिक आदेशमा लगाएको जवाफ पाण्डेले दिएका थिए ।