काठमाडौँ, २५ जेठ– राष्ट्रपति रामचन्द्र पौडेलले नेपाल भ्रमणमा रहेका विश्व म्याराथनको साझा संस्था एसोसिएसन अफ इन्टरनेशनल म्याराथन डिस्टेन्स रेस (एम्स)का अध्यक्ष पाको बोराओलाई एम्सको बोर्ड बैठक नेपालमा राखेकोमा धन्यवाद दिएका छन् ।
राष्ट्रपति पौडेलले नेपाल खेलकुद् र पर्यटनको उर्वर भूमि रहेको बताएका छन् । नेपालमा सगरमाथाको काखमा साहसिक अल्ट्रा म्याराथनदेखि समथल स्थलमा नेपालगञ्ज म्याराथनजस्ता लामो दूरीका दौडहरू सफलतापूर्वक भइरहेको उल्लेख गर्दै राष्ट्रपति पौडेलले एम्स प्रतिनिधिसँग प्रोत्साहनका लागि आग्रह गरेका छन् ।
‘भौगोलिक विविधता सुहाउँदा दौडले पक्कै पनि खेल पर्यटनमा नयाँ सम्भावनाको ढोका खोल्नसक्छ भन्ने मेरो विश्वास छ । यसमा एम्सजस्ता अन्र्तराष्ट्रिय छाता संगठनहरूले प्रोत्साहन गरुन् भन्ने अपेक्षा छ’ उनले भने ।
राष्ट्रपति पौडेलले विश्व शान्ति, भाइचारा र सद्भावका लागि खेलको महत्व रहेको उल्लेख गर्दै दौड संस्कृतिले स्वास्थ्य, स्वस्थ प्रतिस्पर्धा र समुन्नत समाजको निर्माणमा मद्दत पुग्ने विश्वास व्यक्त गरे । नेपालमा पनि खेलकुदको विकासका लागि सरकारले बर्षेनी लगानी बढाइरहेको र निजी क्षेत्रबाट पनि आकर्षण बढ्दै गएको बताएका छन् ।
गत २१ र २२ जेठमा एम्सको बोर्ड बैठक पहिलोपटक नेपालमा राखिएको थियो । साथै, २३ जेठमा नेपाल अन्र्तराष्ट्रिय रनिङ कन्फ्रेन्स र शनिबार नेपाल हेरिटेज रन काठमाडौँ २५ के रेस आयोजना गरिएको थियो । राष्ट्रपति पौडेलले सो अवसरमा नेपाल हेरिटेज रन काठमाडौँ २५ के रेस महिलातर्फकी उपाधि विजेता सन्तोषी श्रेष्ठलाई बधाईसमेत दिए ।
नेपालगञ्ज म्याराथनका संस्थापक अध्यक्ष टीएस ठकुरीले नेपाल अन्र्तराष्ट्रिय रनिङ कन्फ्रेन्सका निष्कर्षहरु र नेपाल हेरिटेज रेस काठमाडौँ २५ के रेसबारे जानकारी गराएका थिए । सो भेटमा एम्स अध्यक्ष पाको बोराओलगायत बोर्ड सदस्यहरु, नेपालगञ्ज म्याराथनका संस्थापकहरु सहभागी थिए ।
राष्ट्रपति रामचन्द्र पौडेलले एम्सका पदाधिकारीसँगको भेटमा दिएको मन्तव्यको पूर्णपाठ
एम्सका अध्यक्ष तथा पदाधिकारीहरू,
सबैभन्दा पहिले म नेपाल भ्रमणमा रहनुभएका तपाईंहरूलाई राष्ट्रपति कार्यालय शीतल निवासमा स्वागत गर्दछु । तपाईंहरूले विश्व म्याराथनको साझा संस्था एसोसिएसन अफ इन्टरनेशनल म्याराथन डिस्टेन्स रेस एम्सको बोर्ड बैठकका लागि नेपाललाई छनौट गर्नुभएकोमा धन्यवाद पनि दिन चाहन्छु । बोर्ड बैठक र नेपाल अन्र्तराष्ट्रिय रनिङ कन्फ्रेन्सबाट आएका महत्वपूर्ण निर्णय र अनुभवहरू आदानप्रदान फलदायी भए होलान् भन्ने अपेक्षा गरेको छु । साथै, खेलकुद् र पर्यटनलाई जोड्नेगरी नेपाल हेरिटेज रन काठमाडौँ २५ के रेस शुभारम्भ भएको थाहा पाउँदा खुसी लागेको लागेको छ ।
नेपाल खेलकुद् र पर्यटनको उर्वर भूमि हो । नेपालमा सबैखाले दौडको सम्भावना छ । सगरमाथाको काखमा साहसिक अल्ट्रा म्याराथनदेखि पश्चिम तराईको नेपालगञ्ज म्याराथनसम्म लामो दूरीका दौडहरू सफलतापूर्वक भइरहेका छन् । हाम्रो भौगोलिक विविधता सुहाउँदा दौडले पक्कै पनि खेल पर्यटनमा नयाँ सम्भावनाको ढोका खोल्नसक्छ भन्ने मेरो विश्वास छ । यसमा एम्सजस्ता अन्र्तराष्ट्रिय छाता संगठनहरूले प्रोत्साहन गरुन् भन्ने हाम्रो अपेक्षा छ
विश्व शान्ति, भाइचारा र सद्भावका लागि खेलको ठूलो महत्व छ । त्यसमा पनि दौड संस्कृतिले स्वस्थ, स्वस्थ प्रतिस्पर्धा र समुन्नत समाजको निर्माणमा मद्दत पुग्दछ भन्ने मेरो विश्वास छ । नेपालले पनि खेलकुदको विकासका लागि प्रयत्न गरिरहेको छ । सरकारले खेलकुदमा बर्षेनी लगानी बढाइरहेको छ । निजी क्षेत्रबाट पनि खेलकुदमा आकर्षण बढ्दै गएको छ ।
अन्त्यमा, हाम्रा विदेशी पाहुनाहरूको नेपाल बसाई सुखद् भयो होला भन्ने अपेक्षा गरेको छु । नेपालको खेल पर्यटनमा यसपटकको जमघटले मद्दत पुगेको महशुस गरेको छु ।
जय नेपाल