सुर्खेत, १० मङ्सिर -चितवनको सौराहामा आजदेखि शुरु नेकपा (एमाले) को दशौं राष्ट्रिय महाधिवेशनमा कर्णाली प्रदेशका प्रतिनिधिहरुले पदाधिकारीमा कम्तीमा एउटा पद आफूहरुले पाउनुपर्ने दाबी गरेका छन् । हालसम्म कर्णालीबाट एमालेको पदाधिकारी र स्थायी कमिटीमा समेत प्रतिनिधित्व छैन् ।
कर्णालीका प्रतिनिधिहरुले पार्टीको केन्द्रीय कार्यकारी भूमिकामा विगतमा उपेक्षा गरिएको भएपनि यसपटक १५ सदस्यीय पदाधिकारीमध्ये एउटा पद दिन नेतृत्वसमक्ष लबिइङ थालेका हुन । त्यसका लागि सचिव पदमा प्रदेश कमिटी सहसंयोजक एवं प्रदेशसभा संसदीय दलका नेता यामलाल कंडेललाई अघि सार्ने तयारी छ ।
एमाले केन्द्रीय सदस्य एवं प्रदेश कमिटी सचिव धर्मराज रेग्मीले कर्णालीबाट हाल केन्द्रीय समितिमा प्रतिनिधित्व गर्ने ११ जना सदस्य, सबै जिल्लाका पार्टी अध्यक्ष, महाधिवेशन प्रतिनिधिहरुले यसबारे मूल नेतृत्वको ध्यानाकर्षण गराइसकेको बताउनुभयो । “पदाधिकारीमा यामलाल कंडेललाई पदाधिकारीमा पठाउन हामी सबै एक ठाउँमा छौं,” उहाँले भन्नुभयो, “सहमति भए नेतृत्वले यसमा विचार गरोस, यदि चुनाव भएको खण्डमा पनि हामी प्रतिष्पर्धा गर्न तयार छौं ।”
एमाले हुम्लाका अध्यक्ष दल रावलले पनि विधानमा सात जना सचिवको पद रहेकाले कम्तीमा सबै प्रदेशबाट प्रतिनिधित्व हुँदा न्यायोचित हुने धारणा राख्नुभयो । “सचिवमा भूगोलको कोटा नछुट्याइएपनि विधानको आशय त्यही हो,” रावलले भन्नुभयो । एमालेको गत असोजमा सम्पन्न विधान महाधिवेशनमा शुरुमा सचिव पद पाँच प्रस्ताव गरिएको थियो । छलफलका क्रममा बहुसंख्यक प्रतिनिधिहरुले कम्तीमा सात बनाउनुपर्ने सुझाव दिएपछि संख्या बढाइएको थियो । महाधिवेशनमा हाल कर्णालीबाट १४० प्रतिनिधिको संलग्नता छ ।
सचिवका आकांक्षी नेता कंडेलले प्रदेशको नेतृत्व विकास गर्ने कुरामा पार्टीको नेतृत्वले ध्यानुपर्ने बताउनुभयो । “राजनीतिक योगदान, संलग्नता र नेतृत्व क्षमता लगायतका सबै दृष्टिकोणबाट हामी कम छनौं, स्वभाविक रुपमा पदाधिकारीमा दाबी रहन्छ,” उहाँले भन्नुभयो, “अझैं पनि इञ्चार्ज प्रदेशबाहिरबाट पठाउनुपर्ने अवस्थाको अन्त्य होस भन्ने कर्णालीका आम कार्यकर्ताको मनोविज्ञान छ ।”
सुर्खेतका स्थायी बासिन्दा कंडेल वीरेन्द्रनगर नगरपालिकाको पूर्व प्रमुखका साथै २०५१ संसदीय निर्वाचनमा प्रतिनिधिसभा सदस्य, २०६४ सालको निर्वाचनमा संविधानसभा सदस्य र २०७४ को प्रदेशसभा निर्वाचनमा विजयी हुनुभएको थियो । पार्टी संगठनमा तत्कालीन भेरी अञ्चल सचिव भइसक्नुभएका उहाँ हाल पोलिट्ब्युरो सदस्य तथा हाल प्रदेश कमिटीको सहसंयोजक हुनुहुन्छ ।
यसैबीच, कर्णाली प्रदेशबाट केन्द्रीय सदस्य पदमा भूगोल, समावेशी र खुलातर्फ गरी २० भन्दा बढी नेताले आकांक्षा व्यक्त गरेका छन् । हालका केन्द्रीयहरु गोरखबहादुर बोगटी, धर्मराज रेग्मी, गुलाबजंग शाह, लक्ष्मी पोखरेल, विष्णु रिजाल, राजबहादुर बुढा, निरज आचार्य लगायत पुनः दोहोरिन चाहेका छन् । तीमध्ये बोगटी प्रदेश अध्यक्ष र रेग्मी सचिव र रिजाल विदेश विभाग उपप्रमुख हुन ।