नौवस्ता औद्योगिक क्षेत्र सफल बनाउन जनप्रतिनिधिदेखि निजीक्षेत्र एकमत, बस्ती व्यवस्थापनमा जोड


नेपालगन्ज ३० साउन :  नौवस्ता औद्योगिक क्षेत्र सफल बनाउन जनप्रतिनिधिदेखि निजीक्षेत्र एकमत भएका छन् । आर्थिक विकासको कोसेढुंगा बन्ने गरी कार्यान्वयन गरिदै गरेको उक्त औद्योगिक क्षेत्र घोषणा भएको पाँच वर्षपछि पूर्वाधार निर्माणको काम शुरु हुँदै छ ।

पूर्वाधार निर्माणको कामका लागि भदौ महिनाको पहिलो साता टेण्डर आह्वान गरिने औद्योगिक क्षेत्र व्यवस्थापन लिमिटेडका अध्यक्ष नन्दकिशोर बस्नेतले जानकारी दिए ।

‘लामो प्रतिक्षापछि नौवस्था औद्योगिक क्षेत्रको पूर्वाधारको काम शुरु हुने भएको छ । यसका लागि चालू आर्थिक वर्षमा रु ६० करोड बजेट विनियोजन भएको छ ।’– अध्यक्ष बस्नेतले भने ।

प्रथम चरणमा औद्योगिक क्षेत्रका लागि व्यवस्थापन भएको ३ सय ३८ बिगाह जमिनमा सडक, बिजुली, पानी जस्ता पूर्वाधारको काम हुने छ । ढिलै भएपनि औद्योगिक क्षेत्रको काम शुरु हुने भएपछि जनप्रतिनिधिदेखि निजीक्षेत्रका अगुवा खुसी छन् ।

उनीहरुले औद्योगिक क्षेत्रको कामलाई सफल बनाउन लागिपर्ने प्रतिवद्धता जनाए । संघीय सांसद महेश्वर गहतराज अथक, संविधानसभाका सांसद एवं पूर्व राज्यमन्त्री दलबहादुर सुनार, नेकपा बाँकेका अध्यक्ष एवं प्रदेश सांसद आईपी खरेल, बैजनाथ गाउपालिकाका अध्यक्ष मानबहादुर रुचाल, उपाध्यक्ष शारदा रेग्मी बिक, नेकपा बैजनाथ गाउँकमिटिका अध्यक्ष चन्द्र चौधरी, वडा अध्यक्ष रामचरण चौधरी लगायतले यस्तो प्रतिबद्धता जनाए । उनीहरुले औद्योगिक क्षेत्रसंग बस्ती बिस्तारको मुद्धालाई प्राथमिकतामा राखेका छन् ।

औद्योगिक क्षेत्र निर्माण हुँदा स्थानीयबासिन्दा बिस्थापित हुँदैनन् भन्नेमा जनप्रतिनिधिले आस्वस्त पारेका छन् । उक्त औद्यागिक क्षेत्र ल्याउन संविधानसभा सदस्य एवं पूर्व राज्यमन्त्री दलबहादुर सुनारले महत्वपूर्ण भूमिका खेलेका थिए भने बैजनाथ गाउँपालिकाका अध्यक्ष मानबहादुर रुचाल त कुनै बेला बस्ती व्यवस्थापन संघर्ष समितिको संयोजक नै थिए ।

सुनार, रुचाल लगायत संघीय संसाद अथक, प्रदेश सांसद एवं नेकपाका अध्यक्ष आइपी खरेलले बस्तीलाई उच्च प्राथमिकतामा राखेका छन् । बस्ती बिस्तार कुन मोडेलमा गर्ने भन्ने विषयमा समेत छलफल भइसकेको छ । बस्ती बिस्तारमा प्रदेश ५ का मुख्य मन्त्री शंकर पोखरेल समेत सकारात्मक रहेको सांसद खरेल बताउँछन् ।

बैजनाथ गाउँपालिका, प्रदेश सरकार र संघीय सरकारमा बस्ती बिस्तार र औद्योगिक क्षेत्रको निर्माणका लागि जनपतिनिधिले पहल गरेका छन् । उनीहरुले नौवस्ता ओद्योगिक क्षेत्र कुनै पनि अवस्थामा निर्माण हुनुपर्नेमा जोड दिएका छन् ।

जनप्रतिनिधि मात्र नभई स्वयं प्रभावित क्षेत्रका बासिन्दा समेत औद्योगिक क्षेत्र निर्माणलाई सहयोग गरिरहेका छन् । तर उनीहरुले आफ्नो व्यवस्थापन हुनुपर्ने जायज माग उठाइरहेका छन् ।

औद्योगिक क्षेत्र निर्माणको काममा आफुहरु कहिल्यै बाधक नहुने स्थानीयको दावी छ । यता नेपालगन्ज उद्योग वाणिज्य संघ र कोहलपुर उद्योग वाणिज्य संघ समेत नौवस्ता औद्योगिक क्षेत्र सफल बनाउन लागिपरेका छन् । नेपाल उद्योग वाणिज्य महासंघका केन्द्रीय सदस्य कृष्णप्रसाद श्रेष्ठले बाँकेलाई औद्योगिक क्षेत्रका रुपमा विकास गर्न नौवस्ता औद्योगिक क्षेत्रको महत्वपूर्ण भूमिका रहने बताएका छन् ।

बिहिवार बाँकेका बसेको सरोकारवालाको बैठकले हाल सर्बसाधारण बसोबास गरेको ओद्योगिक क्षेत्र व्यवस्थापन लिमिटेडको जग्गामा पूर्वाधार निर्माणको काम नगर्ने तर बस्ति नभएको खाली ठाउँमा काम शुरु गर्ने निर्णय गरेको नेपालगन्ज औद्योगिक क्षेत्र व्यवस्थापन लिमिटेडका प्रमुख कृष्ण पुनले जानकारी दिए ।

पाँच वर्षपछि नौवस्ता औद्योगिक क्षेत्रको पूर्वाधारको काम शुरु हुँदै, भदौमा टेण्डर हुने निश्चित


उनका अनुसार बैठकमा बस्ति बाहेकको खालि ठाउँमा पूर्वाधार निर्माणको काम गर्दा सर्वसाधारणबाट अवरोध नगर्ने सहमति भएको छ ।

नौवस्ता औद्योगिक क्षेत्रमा बस्ति बिस्तारको काम भने पूर्वाधार निर्माणसंगै अगाडी बढाउनेमा जनप्रतिनिधि र सरोकारवाला निकायका अगुवाहरु सहमत भएका छन् ।

जनप्रतिनिधिहरुले स्थानीयलाई घरबार बिहिन हुने गरी गरिने निर्णय पनि निर्णयका बिरुद्धमा लाग्नेमा ढुक्क हुन आग्रह गरेका छन् । बैठकमा नौवस्ता औद्योगिक क्षेत्र ल्याउन महत्वपूर्ण भूमिका खेलेका संविधानसभा सुनार सदस्य सहित संघीय सांसद अथक, प्रदेश सांसद खरेल, गाउँपालिका अध्यक्ष रुचालले स्थानीयको व्यवस्थापन आफुहरुको प्राथमिकतामा रहेको बताएका थिए ।

स्थानीयबासिन्दा र जनप्रतिनिधिले सर्बसाधारणको बस्ति व्यवस्थापनलाई उचित ध्यान दिनुपर्ने माग गर्दै अन्यथा आगामी दिनमा समस्या सिर्जना हुने स्पष्ट पारेका थिए । ओद्योगिक क्षेत्र व्यवस्थापन लिमिटेडका अध्यक्ष बस्नेतले स्थानीयलाई मर्का पारेर कुनै काम नगरिने स्पष्ट पार्दै भने,-अहिले टेण्डन नगर्ने हो भने बजेट अन्यत्र जाने खतरा छ ।

‘पूर्वाधार निर्माणको कामसंगै बिस्तारलाई पनि सरोकारवाला निकायले अगाडी बढाउने सहमति भएको छ । आमनागरिकलाई समेत फाईदा होस् भनेर यत्रो प्रोजेक्ट ल्याउँदा उनीहरुलाई बेघरबार बनाउने सवालै आउँदैन ।’– औद्योगिक क्षेत्र व्यवस्थापन लिमिटेडका अध्यक्ष बस्नेतले भने ।

२०७२ सालमा उक्त ओद्योगिक क्षेत्रको घोषणा भएको थियो । बिभिन्न चरणमा ५ सय २५ बिगा जमिनमा औद्योगिक क्षेत्र निर्माण गर्ने भनिएपछि गत आर्थिक वर्षमा ३ सय ३८ बिगाह जमिनमा औद्योगिक क्षेत्र बन्ने गरी औद्योगिक क्षेत्र व्यवस्थापन लिमिटेडको नाममा लालपुर्जा बनाइएको छ ।

यसबाहेक ३१ बिगाह सर्वसाधारण र ३० बिगाह सशस्त्र प्रहरीलाई दिने सहमति भएको छ ।

अब बस्ति बिस्तार गरी औद्योगिक क्षेत्रको बाँकी काम गर्नुपर्ने छ । हालसम्म जग्गा, डिपिआरदेखि ईआइएको काम सम्पन्न भइसकेको छ ।

प्रदेशस्तरकै प्रमुख औद्योगिक क्षेत्रका रुपमा बिस्तार गर्न लागिएको नौवस्था औद्योगिक क्षेत्रमा २ सय बढि उद्योग सन्चालनका लागि आवेदन परेको छ ।

आवेदन दिएका उद्योगीहरु औद्योगिक क्षेत्र कहिले बन्छ भन्दै पर्खिरहेका छन् ।

प्रकाशित मितिः     8:44:14 AM  |