खजुरामा औद्योगिक ग्राम : उद्योगीले दिन थाले चासो,लगानी सम्मेलनको योजना बन्दै


नेपालगन्ज १४ भदौ :  बाँकेको खजुरा गाउँपालिकामा औद्योगिक ग्राम बन्न शुरुभएसंगै उद्योगीहरुले चासो दिन थालेका छन् ।

पूर्वाधार सहित सस्तो जग्गा भाडा लिएर उद्योग सचालन गर्न पाइने भएकाले उद्योगीहरु उत्साहित बनेको गाउँपालिका अध्यक्ष किस्मत कुमार कक्षपतिले बताए ।

उनका अनुसार उद्योगीहरुलाई आर्कषित गर्न कोरोना कहर अन्त्य पछि लगानी सम्मेलन गरिने छ । साना, मझौता तथा ठूला उद्योगहरु स्थापना गर्ने गरी औद्योगिक ग्रामको काम अगाडी बढाइएको हो ।

बाँकेको खजुरामा औद्योगिक ग्रामको काम अगाडी बढाइएको छ । सरकारले मुलुकभर एक गाउँपालिका एक औद्योगिक ग्रामको अवधारणाका क्रममा परेको परियोजना अगाडी बढाइएको हो ।


जग्गा संरक्षणका लागि तारबार र सुरक्षा गार्ड बस्ने भवन पहिलो चरणमा बनाइदै छ, ९२ लाख बजेटमा काम भइरहेको जानकारी दिंदै खजुरा गाउँपालिका कक्षपतिले औद्योगिक ग्रामसम्म स्तरिय १२ मिटर चौडा ग्राभेल सडक पनि बनाउन लागिएको छ ।

नेपाल सरकार, उद्योग तथा बाणिज्य मन्त्रालयले आर्थिक वर्ष २०७६ र ०७७ नीति तथा कार्यक्रम अन्तर्गत एक गाउँपालिका एक औद्योगिक ग्राम स्थापना गर्न देशभर बाट ३२ वटा पालिका छनोट हुँदा पहिलो चरणका ६ वटा गाउँपालिकामा खजुरा पर्न सफल भएको हो । २६ वटा नगरपालिका र ६ वटा गाउँपालिका छनोट भएका थिए ।

बाँकेमा खजुरा गाउँपालिका मात्र औद्योगिक ग्राम निर्माण गर्नको लागि छनोटमा परेको छ ।

योजना अधिकृत दिल बहादुर पौडेलका अनुसार, खजुरा गाउँपालिका वडा न. ६ उढरापुर पुरैनीमा रहेको २१ विगाह सरकारी जग्गामा निर्माण कार्य अघि बढाइएको हो ।
खजुरा गाउँपालिकाले गौरवको योजनाका रुपमा लिएर औद्योगिक ग्रामलाई सफल बनाउने पालिका प्रमुख कक्षपतिको भनाइ छ ।

प्रकाशित मितिः     10:05:45 AM  |