नेपालगन्ज । नेकपा एमालेको २०७५ जेठ २ अघिको संरचना अनुसार लुम्बिनी प्रदेश कमिटिको बैठकले प्रदेशका १२ वटै जिल्लामा जेठ २ गतेको संरचना अनुसार कमिटीहरु ब्युँताउने निर्णय गरेको छ । उक्त निर्णय अनुसार बाँकेमा पार्टी अध्यक्ष निरक गुरुङ, उपाध्यक्ष किस्मत कक्षपति, सचिवमा रत्न खत्री र सहसचिवमा प्रमोद धितालले जिम्मेवारी दिएका छन् ।
माधव नेपाल समूहमा सक्रिय भएपनि पार्टी बिभाजनको बिपक्षमा लाग्ने निर्णय गर्दै सचिव रत्न खत्रीले जिम्मेवारी सम्हाल्ने बताएका छन् । उनले एमालेलाई जेठ २ मा फर्काउने निर्णय कार्यान्वयन भएकाले एमालेमा आएर साविकको जिम्मेवारी सम्हाल्न अनुरोध गरेका छन् । एमाले उपमहासचिव तथा प्रदेश इन्चार्ज विष्णु पौडेलको उपस्थितिमा बुटवलमा बसेको बैठकले एमाले स्थायी कमिटिको निर्णय कार्यान्वयन गर्ने निर्णय गरेको बैठकमा सहभागी एक प्रदेश कमिटीका सदस्यले जानकारी दिए ।
१५ असारमा बसेको एमाले स्थायी कमिटि बैठकले एमालेको संगठनको संरचनालाई २०७५ जेठ २ मा लैजाने निर्णय गरेको थियो। बैठकले नेकपा एकिकृत समाजवादीमा खुलेका सदस्यहरुलाई हटाएर बाँकी संरचना २०७५ जेठ २ को ब्युँताउने निर्णय गरेको ती सदस्यले बताए ।
बैठकले लिला गिरीको अध्यक्षतामा प्रदेश कमिटीको पदाधिकारी चयन गरेको प्रदेश कमिटीका सचिव भुमेश्वर ढकालले जानकारी दिए । बैठकले खेममान खड्का उपाध्यक्ष, भुमेश्वर ढकाल सचिव तथा दुर्गा थारुलाई सहसचिव चयन गरेको सचिव ढकालले बताए ।
२०७५ अघिको संरचनामा उपमहासचिव पौडेल प्रदेश संयोजक थिए । पार्टी एकिकरण पश्चात नेकपा बनेपछि मात्र शंकर पोखरेललाई लुम्बिनी प्रदेश इन्चार्ज तोकिएको थियो ।
साविकको जिल्ला अध्यक्षले एमाले छाडेको हकमा उपाध्यक्षलाई अध्यक्ष बनाउने र दुबैले पार्टी छाडेको अवस्थामा नयाँ अध्यक्ष मनोनयन गर्ने निर्णय भएको समेत उनले बताए । लुम्बिनी प्रदेशमा निकै कम जिल्लामा एमाले छाडेर एकिकृत समाजवादीमा खुलेका कारण पुरानो संरचनामा ब्युँताउन असहज नहुने बताईएको छ । बैठकले माओवादी केन्द्रसँग एकता पश्चात माओवादीमा नफर्केका नेताहरुलाई यथास्थानको पद दिने समेत निर्णय भएको स्रोतले दाबी गरेको छ ।
बैठकमा सर्वोचचको आदेशबाट एमाले र माओवादी केन्द्र ब्युतिएपछि माओवादी केन्द्र नफर्केर एमालेमै रहेका नेता टोपबहादुर रायमाझी, नेपालपक्षमा सक्रियरुपमा लागेर एकिकृत समाजवादीमा नगएका ठाकुर गैरे लगायतका नेताहरुको सहभागीता रहेको थियो ।