बाँके–लुम्बिनी प्रदेशका मुख्यमन्त्री चेतनारायण आचार्य शनिबार नेपालगञ्जमा आयोजित मुस्लिम इत्तेहाद संगठनको राष्ट्रिय महाधिवेशन उद्घाटन समारोहमा सहभागी हुन पुग्नु भएको थियो ।
कार्यक्रममा सहभागी भएसँगै मुख्यमन्त्री आचार्यलाई नेपालगञ्ज उपमहानगरपालिका–२२ मा रहेको किगंरियनपुर बस्तीबाट एउटा ज्ञापनपत्र बुझाइयो ।
जब मुख्यमन्त्री आचार्यले ज्ञापनपत्रमा समेटिएका विषयहरू अध्ययन गर्नु भयो, त्यसपछि उहाँलाई बस्तिमै पुगेर स्थलगत अवलोकन गर्नुपर्ने आवश्यकता महसुस भयो । किनभने समुदायले भोग्दै आएका समस्याहरू त्यस ज्ञापनपत्रमा समेटिएका थिए ।
बाँकेको नेपालगञ्ज उपमहानगरपालिका सुगम र सम्पन्न मानिन्छ । तर पनि यस भित्र रहेका केही बस्तीहरूमा अझै विकास पुग्न सकेको छैन । शिक्षा, स्वास्थ्यजस्ता आधारभूत सेवाबाट नागरिकहरू अझै टाढा रहनु परेको अवस्था छ ।
त्यसपछि मुख्यमन्त्री आचार्य किगंरियनपुर बस्ती पुग्नुभयो । नजिकबाट बस्ती नियालेर हेरेपछि उहाँले समस्या समाधानका लागि प्रदेश सरकारले पहल लिने अठोट गर्नुभयो । `यहाँका अधिकांश व्यक्ति विद्यालय शिक्षाबाट टाढा रहेको पाएँ । ठूलो र संयुक्त परिवार भए पनि उद्यमशीलता र स्वरोजगार हुन नसकेको अवस्था रहेछ´उहाँले भन्नुभयो-`यहाँ शिक्षा, स्वास्थ्यजस्ता आधारभूत सेवा पुर्याउन प्रदेश सरकारको गम्भीर ध्यानाकर्षण भएको छ । यहाँका नागरिकको जीवनस्तर उठाउन प्रदेशले विशेष योजना बनाउने विषयमा छलफल अघि बढाउँछु ।´
यस बस्तीमा बसोबास गर्ने नागरिकहरूले मागेर गुजारा चलाउने अवस्था छ । सरकारले उद्यमशीलता विकासमा योजना बनाएको खण्डमा समुदायका मानिसहरू त्यसमा सहभागी हुने चाहना राखेको पाइएको छ ।