बाँके । नरैनापुर गाउँपालिकाका सेवाग्राहीले अब स्थायी लेखा नम्बर (प्यान), करचुक्ता प्रमाणपत्रलगायतका करदाता सेवा गाउँपालिकाबाटै पाउने भएका छन्।
साविकमा करदाता सेवा कार्यालयबाट प्रदान हुँदै आएका सेवा स्थानीय तहबाट प्रवाह गर्ने नेपाल सरकारको निर्णयअनुसार आन्तरिक राजस्व कार्यालय नेपालगन्ज र नरैनापुर गाउँपालिकाबीच समझदारी पत्रमा हस्ताक्षर भएको हो।
समझदारीअनुसार गाउँपालिकाले आफ्नो क्षेत्रभित्र बसोबास गर्ने प्राकृतिक व्यक्तिलाई व्यक्तिगत स्थायी लेखा नम्बर (पर्सनल प्यान) जारी गर्नेछ। त्यस्तै, स्थानीय तहको क्षेत्रभित्र ठेगाना भई दर्ता भएका व्यवसाय तथा निकायलाई व्यावसायिक स्थायी लेखा नम्बर (बिजनेस प्यान) जारी गर्नेछ।
स्थानीय तहको क्षेत्रभित्र ठेगाना भएका व्यक्तिगत व्यवसाय तथा निकायले मूल्य अभिवृद्धि करमा दर्ताका लागि निवेदन दिएमा गाउँपालिकाले आवश्यक कागजात भिडान गरी आन्तरिक राजस्व कार्यालयमा सिफारिस गर्नेछ। त्यसपछि दर्ता प्रमाणपत्र उपलब्ध गराउने व्यवस्था समझदारीमा गरिएको छ।
अन्त:शुल्क इजाजतपत्र लिनुपर्ने व्यवसायका हकमा पनि नयाँ इजाजतपत्र तथा नवीकरणका लागि आवश्यक कागजात भिडान गरी आन्तरिक राजस्व कार्यालयमा सिफारिस गर्ने र इजाजतपत्र उपलब्ध गराउने काम स्थानीय तहबाट हुनेछ।
